Жаңалықтар

Наурыз – ежелгі салт бойынша Жаңа жылды қарсы алу мерекесі ғана емес, бұл көктем, ояну және жаңару мерекесі. Көктемнің шуақты күндерімен қатар келетін Наурыз мерекесін бүгін №7 жалпы білім беретін мектеп атап өтті. Мереке «Этно ауыл» ұйымдастырылған мектеп ауласында өтті.  Этно ауылда киіз үй тігілді және ұлттық нақышта безендірілді. Ұлттық ойындар өткізілді, театрландырылған көрініс, мерекелік концерт қойылды және ұлттық тағамдардан дәм ұсынылды.
Мерекенің ресми бөлігін мектеп директоры Искаков Ж.М. ашып, жиналған қауымға жылы лебізін білдірді.
Наурыз мейрамының қадірлі қонағы – Қыдыр ата халықты мерекемен құттықтап, ақ батасын берді. Қыдыр бабаның рөлін қазақ тілі мен әдебиеті пәні мұғалімі Өтеулі А.Т. сомдады.
Дәстүр бойынша іс-шара «Шашу» салтымен ашылып, балалар мен мереке қонақтарының көңілінен шықты. Салтанатты іс-шара мектептің дарынды балалары – 4-сынып оқушысы Төкен Төлеберген мен 9-сынып оқушысы тамаша күйші Әлішер Беутаевтың өнер көрсетуімен жалғасты.
«Адель» би тобының көктем мерекесіне дайындаған би өнері мерекелік концерттің көркін келтірді. Одан кейін арқан тарту, асық ату сияқты спорттық ойындар өткізілді. Мереке соңында барлық қатысушылар ұлттық «Қара жорға» биін биледі.
Наурыз мерекесін ұйымдастыруға оқушылар, ұстаздар және ата-аналар қатысты. Киіз үйде қонақтарға ұлттық тағам – Наурыз көже ұсынылды.